မှန်ပါသည်၊ ရှင်တော်မြတ်ဘုရားသည် နိကာယ်ငါးရပ် ပီဋကတ်သုံးပုံ၌ ယင်းလေးမျိုးတို့၏ အကြောင်းကို အနည်းနည်း အဖုံဖုံ အကျဉ်းတစ်မျိုး အကျယ်တဖုံ စုံလင်စွာ တန်ဆာဆင်၍ ဟောကြားခဲ့ပါသည်။
အများမှ အနည်းသို့
ယင်း ကုသိုလ် (၄)မျိုးတို့တွင် ဒါနကုသိုလ်သည် ပြုဖို့ရာ အလွယ်ကူ ဆုံးဖြစ်ပါသည်။
မှန်ပါသည်၊ ဒါနကုသိုလ်ကို ကလေးအငယ် လူမမယ်များမှစ၍ ပြုကြပါသည်။ ပြုတက်ကြပါသည်။
အရွယ် အလယ်အလတ်နှင့် ကြီးသူများအဖို့မူ အဘယ်ဆိုဖွယ်ရာ ရှိပါအံ့နည်း။ ပြုတက်ကြသည်ချည်းဖြစ်ပါသည်။ ပြုကြသည်ချည်း ဖြစ်ပါသည်။
ဒါနကုသိုလ်မှ တစ်ဆင့်တက်၍ သီလကုသိုလ်အောက် အတော်များများနည်းပါးသွားပါသည်။
သမထကုသိုလ်မှ တစ်ဆင့်တက်၍ ၀ိပဿနာကုသိုလ်ကို ပွားများသူ ဦးရေကား သမထကုသိုလ်အောက် အတော်များများ နည်းပါသွားပြန်သည်။
မြင့်လေ နည်းလေ
လောကဥပမာနှင့် ပြောရသောမူလတန်းအဆင့် ကျောင်းသူကျောင်းသားဦးရေသည် များပါသည်။
ထို့နောက် အလယ်တန်းအဆင့် ကျောင်းသူကျောင်းသား ဦးရေကား နည်းပါးသွားပါသည်။
ထို့နောက် အထက်တန်းအဆင့်အထိ ကျောင်းသူကျောင်းသား ဦးရေကား နည်းပါးသွားပါသည်။
ထို့နောက် တက္ကသိုလ် ကောလိပ် အဆင့်ဖြစ်သော ကျောင်းသူကျောင်းသား ဦးရေကား နည်းပါးသွားပါသည်။
ယင်းကို ထောက်သော် များတဲ့နေရာတွင် အရည်အချင်းညံ့ဖျင်းသူ ဦးရေများခြင်းကိုတွေ့ရ၍ အဆင့်အဆင့် နည်းသွားသည့်အလျောက် အရည်အချင်းလည်း မြင့်လာတာကိုတွေ့ရပါသည်။
တက္ကသိုလ်အဆင့် ကောလိပ်အဆင့် ရောက်လာသူသည် အောက်အဆင့်များကို ကျော်ခဲ့ပြီဖြစ်၍ အရည်အချင်းပြည့်ပြီး အောက်အဆင့်များကို မူစရာ ရှုစရာ မလိုတော့သလို ကုသိုလ် (၄) မျိုးတို့တွင် ၀ိပဿနာကုသိုလ်အဆင့်အထိ ရောက်ပြီးသူသည်
အောက်ဆင့်ဖြစ်သော ဒါန၊ သီလ၊ သမထမှုတို့ကို မမှုတော့ပါ၊ အလွယ်သာ ပြုနိုင်ပါသည်။
နှိုင်းယှဉ်ပြ
ကုသိုလ် (၄)မျိုးကို အတန်းပညာနှင့် နှိုင်းယှဉ်ပြက ဒါနကုသိုလ်သည် မူလတန်းပညာနှင့်တူ၏။
သီလကုသိုလ်သည် အလယ်တန်းပညာနှင့်တူ၏။ သမထကုသိုလ်သည် အထက်တန်းပညာနှင့်တူ၏။ ၀ိပဿနာကုသိုလ်သည် တက္ကသိုလ်ကောလိပ်ပညာနှင့် တူ၏။
အများမှ အနည်း၊ အနည်းမှအများ။ ။ ကုသိုလ် (၄)မျိုးကို ပြုလုပ်သူတို့သည် ဦးရေအများမှ အနည်းသို့
လျှော့သွားသော်လည်း ယင်းကုသိုလ်တို့၏ အကျိုးမှာမူ အနည်းမှအများသို့ တိုးတက်သွားပါသည်။ မှန်ပါသည်။ ဒါနကုသိုလ်အကျိုးထက် သီလကုသိုလ်အကျိုးက သာလွန်မြင့်မြတ်ပါသည်။ သီလကုသိုလ်အကျိုးထက် သမထကုသိုလ်အကျိုးက သာလွန်မြင့်မြတ်ပါသည်။ သမထကုလိုလ် အကျိုးထက် ၀ိပဿနာကုသိုလ်အကျိုးက သာလွန်မြင့်မြတ်ပါသည်။
မည်သူ့ကိုမဆို " အသင့်ကို ဟောဒီမှာ ပထမတန်းစားပစ္စည်း၊ ဒုတိယတန်းစားပစ္စည်း၊ တတိယတန်းစားပစ္စည်း၊ စတုတ္ထတန်းစားပစ္စည်းရယ်လို့ ပစ္စည်းလေးမျိုးရှိသည့် အနက် တစ်မျိုးပဲ ပေးမယ်၊ အဲဒီ(၄) မျိုးထဲက အသင့်ကြိုက်တဲ့ တစ်မျိုးကို ရွေးယူပါ"ဆိုလျှင် ပထမတန်းပစ္စည်းကို ရွေးယူမှာသေချာပါသည်။
ကုသိုလ် (၄)မျိုးတို့တွင် ဒါနကုသိုလ်သည် စတုတ္တတန်းစားပစ္စည်းနှင့် တူပါသည်။
သီလကုသိုလ်သည် တတိယတန်းစား ပစ္စည်းနှင့် တူပါသည်။
သမထကုသိုလ်သည် ဒုတိယတန်းစားပစ္စည်းနှင့်တူပါသည်။ ၀ိပဿနာကုသိုလ်သည် ပထမတန်းစားပစ္စည်းနှင့် တူပါသည်။
(၁၀)ရက်စခန်းကုသိုလ်
ကုသိုလ် (၄)မျိုးတွင် (၁၀) ရက်စခန်း တရားပွဲရဲ့ အဓိက ပဓာနကုသိုလ်သည် ၀ိပဿနာကုသိုလ် ဖြစ်ပါသည်။
ဝိပဿနာကုသိုလ် ကုသိုလ် (၄)မျိုးတို့တွင် အမြတ်ဆုံးကုသိုလ် ဖြစ်ပါသည်။
အမြတ်ဆုံး ၀ိပဿနာကုသိုလ် ပြုပွဲ၌ လူဦးရေသည် နည်းလှပါသည်။
ယင်းကိုထောက်သော် အမြတ်စား၊ အကောင်းစားသည် လူတိုင်းနှင့်မတန်၊
လူတိုင်းမရယူနိုင်သော ကုသိုလ်ဟု သိနိုင်ပါသည်။
မှန်ပါသည်၊ ဤလောက၌ ရတနာအများရှိရာ၊ တန်းဖိုးကြီးလှသော " စိန်၊ ပတ္တမြား၊ နီလာ၊ မြ " ဆိုတဲ့ အဖိုးတန်ရတနာများကို လူတိုင်း မဆင်မြန်းနိုင်၊ မသုံးစွဲနိုင်ကြပါ။
လောကီရေးအနေနှင့် ပစ္စည်းအထက်တန်းရှိသူများမှသာ သုံးစွဲနိုင် ပန်ဆင်နိုင်ကြပါသည်။
ထို့အတူပင် ကုသိုလ်ကို သူတော်ကောင်းဥစ္စာရတနာ ပေါကြွယ်ဝသော သူတော်သူမြတ်တို့သည်သာလျှင် ကျင့်ကြံကြိုးကုတ် အားထုတ်သောအားဖြင့်ပန်ဆင်နိုင်ကြပါသည်။ သုံးဆောင်နိုင်ကြပါသည်။ သူတော်ကောင်း ဥစ္စာရတနာအဆင့်အတန်းနည်းပါးသူများ မပန်ဆင် မသုံးဆောင်နိုင်ကြပါ။ ။
စာဖတ်သူတို့ရော ပထမတန်းစားအလှူ ၊ ဒုတိယတန်းစားအလှူ ၊ တတိယတန်းစားအလှူ ၊ စတုတ္ထတန်းစားအလှူ ရယ်လို့ အလှူလေးမျိုးရှိသည့် အနက် မည်သည့်အလှူကို ပြုပြီးကြပီလော။
ဓမ္မဒူတ - အရှင်ပညာဇောတ
မီးကျီးတွင်းမှ ပွင့်သောကြာ စာအုပ်မှ ကောက်နှုတ်ဖော်ပြထားပါသည်။
၁၇.၁.၂၀၁၂
No comments:
Post a Comment